मनोरञ्जन

'माइ नेम इज रागा'काे टीजरमा यस्ता देखिए राहुल गान्धी

नयाँ दिल्ली । भारतमा लोकसभा चुनाव नजिँकिदै गर्दा ठूला पर्दाहरूमा राजनीतिक विषयवस्तुका चलचित्रहरू रिलिज हुन थालेका छन् ।

यहि सिलसिलामा काँग्रेस आईका अध्यक्ष राहुल गान्धीको जीवनमा आधारित बायोपिक बन्ने भएको छ । यस चलचित्रको नाम ‘माई नेम इज रागा’ राखिने तय भएको छ । 

राहुल गान्धीमाथि बन्ने यस चलचित्रको टीजर युट्युबमा रिलिज भएको छ । भारतकी पूर्वप्रधानमन्त्री इन्दिरा गान्धीको हत्याको दृश्यबाट टीजरको सुरुवात हुन्छ । उक्त दृश्यमा इन्दिरा गान्धीमाथि गोलीको वर्षात गराइएको देखाइएको छ । 

यस चलचित्रमा राहुल गान्धीको बाल्यकाल देखि काँग्रेस अध्यक्ष बन्दासम्मको कहानी देखाइने बताइएको छ । चलचित्रमा राहुलको जीवनका महत्वपूर्ण पाटाहरू देखाइनेछ ।

‘माइ नेम इज रागा’मा राहुल गान्धीसँग सम्बन्धित राजनीतिक विवादहरूलाई समेत देखाइने प्रयास गरिएको टीजर हेर्दा थाहा हुन्छ । 

रुपेश पालको स्क्रिप्ट र निर्देशन रहेको चलचित्रमा अश्विनी कुमारले राहुल गान्धीको भूमिका निभाएका छन् । त्यस्तै चलचित्रमा नरेन्द्र मोदीको भूमिकामा हिम्मत कपाडिया देखिएका छन् ।

टीजरमा पूर्वप्रधानमन्त्री मनमोहन सिंहलाई समेत समेटिएको छ । पूर्वप्रधानमन्त्री सिंह टीजरको एक दृश्यमा राहुलको समय आएको बताउँदै उसलाई जिम्मेवारी सम्हाल्न भन्छन् ।

चलचित्रमा राहुल गान्धीलाई प्रेस कन्फरेन्समा पत्रकारहरूका कडा सवालहरूको जवाफ दिदैँ गरेको देखाइएको छ । राहुल गान्धीका अलावा भारतका प्रधानमन्त्री नरेन्द्र मोदीको बायोपिक पनि बनिरहेको छ, जसमा विवेक ओबराय मोदीको भूमिकामा देखिनेछन् ।

गान्धी र मोदीभन्दा पहिले पूर्व प्रधानमन्त्री मनमोहन सिंहको जीवनीमा आधारित बायोपिक ‘द एक्सिडेन्टल प्राइममिनिष्टर’ रिलिज भएको थियो । यसमा अभिनेता अनुपम खेर सिंहको भूमिकामा देखिएका थिए ।